يمكن دي حاجة مانختلفش عليها إن ناس كتير مننا ما أسعفهمش القدر إن مجال دراستهم يكون هو نفس المجال اللي بيحبوه أو متمكنين فيه أو عندهم الشغف إنهم يقضوا فيه عمرهم و مستقبلهم ، قصة بتتكرر كتير و لسه هتتكرر أكتر .. و قصتنا النهاردة مفيهاش اختلاف عن باقي القصص دي لكن اللي بيميزها حاجة واحدة بس .. الإصرار.
" المبرمج "
الحلم الصغير اللي بدأ من حوالي سنتين و لسه صغير لكن مسيره هيعدي و يكبر و يبقى شركة من أكبر شركات البرمجيات في الشرق الأوسط ، أيوه احنا بنقول كده بصوت عالي من غير خجل لأننا مؤمنين إن الحلم عمره ما كان عيب ، العيب إن يبقى عندك حلم و ماتسهرلوش لحد ما عنيك تورم.
احنا الحمد لله واثقين في إمكانياتنا و عارفين إننا نقدر نفيد عدد كبير من الناس ، قبل كده نزلنا شروحات كتير عن مواضيع برمجية مهمة و عملنا مسابقة بسيطة بس كانت ممتعة و ناس شاركت و جاوبت و الفايز أهديناه جايزة بسيطة من عندنا ، قبل كده حاولنا نتسلى شوية و غفلنا شركة من أكبر شركات الإتصالات في مصر و أخدنا نت مجاني لفترة مش قليلة :D
مشكلتنا الوحيدة إننا مش عارفين نوصل للفئة المعينة اللي تهتم بالمحتوى اللي بنقدمه و تدعمنا و تشجعنا إننا نتحسن.
المبرمج طالب في كلية حقوق جامعة اسكندرية حلمه إن يشوف حلمه مش مجرد حلم.
